Een Reis int Ungewisse.
In dat Johr Nägenhunderteinundsömzich bün ick bi de Dütsche Seerederei as Nautischen Offizier fohrt un uns Schipp har Kurs up Indien makt, also een lange Reis vör uns.
An Christmand ankerten wi in den Häben von Colombo, Sri Lanka. Dor is dat bannich heit wäst, öwer dörtich Grad plus, de Sweit leb mi den Nors handal.
Nun sullt jo bald Wiehnachten sin, äwer bi dese Hitt keem keen Wiehnachtsgefeul up. Wi harden sogor eenen Wiehnachtsbbom an Burd, den häbt wi extra von Rostock mitbröcht un in de Kühlung verpackt. Nu stünn hei in de Mess, de Wiehnachtsfier wür organisiert un de Jungs freuchten sik doch up den Wiehnachtsmann.
Nur ick häw mi nich so richtig wohl feult, mi wür so bannich malade un ick har dulle Buukweihdach krägen. De Buukweihdach hürten nich up, sei ümmer duller worden. Wat wier dat End vont Leed?
Blinddarmentzündung!
Also aw int Krankenhus, runter mit dat Diert und dat in soo een frömdes Land, ick ganz alleen.
Dat Schipp mööt wedder awdüsen un ick bün dorbläben. De Jungs häbt mi Gaudes wünscht und por Saken dorlaten ünner annern mienen Wintermantel.
Nah een por Dag, as ick wedder up den Damm wäsen, sullt ick mit een Fleiger nah Hus fleigen. Dor in Colombo wir dat jo noch ümmer schöin warm un komodich un ick har miene Sommerkledasch up den Liew. In den Fleiger hät mi dat doch een bäten grucht, denn Luft is nich Warer, ick häw dacht, hoffentlich kam ick heil werrer dal.
As ick so vör mi hendüste, dor kem een Herr von der DDR-Botschaft, hätt mi ansproken un mi wedder een beeten üpricht, hei har den Uptrach mi een tau betreuen. Nu wür mi bäder tau Maud.
De Fleiger flöch öwer Karachi un Theran direktens nah Moskau. De Schnaker öwer Burdfunk sächt: "Söbentein Grad minus in Moskau"
Nu künnt ick mienen Wintermantel jo doch ganz gaud gebruken, äwer dat is gor nich so einfach wäst, de wir jo in mienen Kuffer in den Gepäkrum. Dor dörft kein ein rinner, also möst ick teuben.
Nu möst ick in mine Sommerkledasch in Moskau rümmerlopen bet hen nah dat Hotel. Wat mi dat schuddert un de Lüd keken mi an, as wenn ick een beeten dösich wir.
Int Hotel künn ick endlich mienen geleiwten Wintermantel utpacken. An Leiwsten har ick mi domit int Bett verkropen.
An den nächsten Dach güng dat per Fleiger nah Berlin un mit de Isenbahn öwer Rostock (nich Bonn), Bentwisch nah Hus, nah Dierhagen bi miene Fru, de sick natürlich hellsch freut hät.
Ick häw dat Abenteuer gaud öwerstahn, bün gesund bläben. Miene Seemannskumpels sünd to de Tied ümmer noch upt Worer wäst.
Na tschüß ook!